Cek Medya Hus

Kruseumangat rahmat nyang kuasa
Katroh kutika buleuen Ibadah
Buleuen Ramadhan keu Insan dumna
Hamba mulia iman keu Allah

Siblah buleun mita beulanja
Tanyoe keurija mita nafakah
Cuma sibuleuen tatheun dahaga
Tanyoe puasa peule ibadah

Nibak buleun nyoe tanyoe syedara
Meuganda fahla nebi le Allah
Ureueng meiman seunang lagoe na
Rasa gembira troh buleun rahmah

Mandum geutanyoe sinoe lam donya
Islam mulia nyang ikot sunnah
Buleun Ramadhan amalan geu mita
Ihklas taqwa keupada Allah,

Buleun kemenangan insan nyang taqwa
Lam jeut kutika sabe ibadah
Wajeb ngon sunat meuhat keurija
Ubit ngon raya mandum faedah

Ingat rakan lon kawom syedara
Buleun mulia bek pubuet salah
Kon theun deuk mantong tanyoe keurija
Tapi anggata bek na buet salah

Jaroe ngon gaki bibi ngon mata
Bek roh keurija nibak buet salah
Upat ngon caci lagi ngon ceula
Bek roh peusuna hasut ngon fitnah

Buleun ramadhan insan mulia
Sunggoh taqwa pujoe Po Tallah
Ji oh ngon maksiet ubit ngon raya
Hana keurija meunyo meusalah

Nyan insan meunang seunang oh lusa
Sajan Anbiya ngon Rasulullah
Peue lom meuteumee Lailatulqadar,
Teumpat Syuruga peunulang Allah,
SHARE :
 
Top