Loading...

Salammu’alaikum warahmatuhu
Saleum lon tuju bandum syedara
Keu ware’h kaom barat ngon timu
Umi ngon abu seureuta ma’wa

       Deungon bismillah tapujo rabboen
       Rahmat meuhimpoen keuno lam donya
       Buleun zulhijjah akhe nibak thoen
       Siploeh awai phoen ta iedul adha

Na lhee ibadah nibak buleun nyoe
Lakee bak sidroe tuhan kuasa
Phon-phon ibadat hat beungoeh uroe
Rakyat lam nanggroe meu-uroe raya

       Ujoeng mu pisang timoh boh jantoeng
       Deungon ujoeng oen timphan meuputa
       Geubrie keujamee ngon ie cap patoeng
       Dodoi  ngon lontong sajan seureuta.

Nyang Peugeot seupet pasoe lam teumpat
Peuduk meusapat diateuh meja
Geubrie keuwareh seureuta sahbat
Nyang jak peuteupat samboeng syedara

       Keudua haji bagi na mudah
       Keudeh meulangkah tanoeh mulia
       Tereubang Garuda peukeu u ka’bah
       Lakee bak allah beu-ek mabrura.

Geupubut rukoen wajeb ibadah
Sai bak marwah geulari lanja
Tawaf nyang tujoeh geulingka ka’bah
Lontar jamarah geurhom jen raya

       Teuma diwukuf padang arafah
       Bak muzdalifah geumabit saja
       Malam dimina suroeh potallah
       Bak taman raudhah geumohon do’a

Teuma nyang keulhee ibadah qurban
Geupotong hewan bak uroe raya
Lagee geupubuet dilee saboh jan
Uleh junjongan rasul Mustafa

       Nabi ismail nibak masanyan
       Geuyu lee tuhan sembelih sigra
       Nibak Ibrahim tuhan neupeutrang
       Nibak simalam leumah rahsia.

Haba neupeugah oh saree fajar
Nibak ti hajar ibrahim calitra
Watee neupeutroh bak siti hajar
Hana cit geutar hatee ibunda

       Geumat ismail jaroe blah uneun
       Peudeung blah uwie kilat meucahya
       Geutop ngon mata ismail geutheun
       Allah karonya ganto ngon domba.

 Tuhan neu ujo hamba meuiman
Kalon keikhlasan nobak po harta
Peuna teuingat keu nyang poe alam
Nyang bree dum makan keu nyang meuyawa.

Oh no keuh dilee ca’e lon karang
Katrep hai rakan  lon suson kata
Meunyoe nasalah harap betulkan
Maklum lon tuan koen ulum sastra.
                                                            Adly Muhammad. Jogjakarta, 10 September 2016
SHARE :
 
Top