Oleh : Cek Medya Hus
 |
| dok. habadaily.com |
Pujoe keu Tuhan Alhamdulillah
Nyang Maha meugah maha Kuasa
Seulaweuet saleuem keu Rasulullah
Nabi nyang meugah pang ulèe dumna
Seureuta sahabat meuhat nyang meugah
Lheuh nyan meutamah ngon keluarga
Para Ulama beuna jeut sa′ah
Nyang bi ijzah ilmèe lam dônya
Deungon rahmat Po sidroe ya Allah
Rahmat meutamah sehat anggota
Ék lôn keumarang bah kadang susah
Ngon izin Allah han sapeue mara
Sayang keu didi gaki kapatah
Di yub bak nipah eumpeuen di mita
Na bacut caé lôn rawe kisah
(Covid 19) sikureueng blah, virus
corona
Mulai meulanda di cina wabah
Sehingga luwah ban saboh dônya
Le that nyang maté meugulé punah
Le ureueng gundah lam harô hara
Meunyö yôh jameun taꞌeun geupeugah
jinoe jikheun sah virus corona
Le ureueng takôt ribôt meuleumpah
Jeut nanggroё susah jinoe meulada
Katrôh bak tanyoe jinoe meuwabah
(Covid 19) sikureueng blah di indonesia
Sampé u acèh ka tupèh wabah
Lé pemerintah atôran geupeuna
Untuk atasi bèk lé trôh wabah
Cara ta teugah bak dokto kana,
Jaga kesehatan badan beugagah
Jaroe beutarah tasabôn rata
Tajaga jarak emak ngon ayah
Bak ramè jeulah bèk tanyoe teuka
Tapakèk masker beuteutôp babah
Na lom geupeugah mumat jaroe bèk na
Untuk koh rantai virus meuwabah
Jinoe ka jeulah atôran geupeuna
Peupré sikula seureuta kuliyah
Hubungan daerah peuputôh sigra
Meunan cit teuma kantô pemerintah
Lam aktifitas nyang peunténg saja
Top warông kupi jeutsi bèk peuhah
Lheueh nyan geupeugah bèk peugot acara
Ureueng meukawén meuchén ka jatah
Όh lheueh meunikah han jeut na pesta
Khanduri laén dan panggông ceuramah
Hajeut geupeugah jak jak wisata
Trôh bak masjid nacit geupeugah
Teuntang jamaah siat tatunda
Uleh Ulama pihna geupeugah
Virus taceugah peunténg lagoe na,
Taduek di rumoh dak mèhmöh susah
Nyö ka peurintah siat tasaba
Peue lom oh malam nyan ka peurintah
Bèk lé meulangkah ho ho nyang hawa
Nyang ureueng jamèe teuntèe ban
langkah
Ubak peutugah jak lapur sigra
Peue lom ban geuwoe nanggroe eropah
Kadang cit wabah bak gobnyan kana
Untuk hindari jeut si taceugah
Patéh meutuah seruan bersama
Pihak kesehatan nyan kerja tugah
Tangani wabah fasien derita
Deungö informasi nyanpi beujeulah
Bèk patéh bagah haba tan beuna
Nyang haba hoak bèk jak peuluwah
Berita tan jeulah bèk tapeucaya
Dan bacut saran lôn tuan peugah
Cara perintah beubijak sana,
Beuna solusi pakriban ulah
Di pemerintah geupiké beuna
Rakyat han jeut jak hai pak meutuah
Mita nafakah pakriban cara
Meunyö nyang kaya hana masalah
Na peue geukeubah teubai beulanja
Teutapi meunyö meupunyö susah
Ureueng tueng upah mita beulanja
Pakri ban cara ta tangani pah
Seulama musibah tapiké cara
Bandum geutanyoe lam bumoe Allah
Seunang ngon susah pasti tarasa
Ikôt atôran nyan peunténg leupah
Kebijakan perintah pih di utama
Bé na atôran rakan meutuah
Cara ta ceugah saboh usaha,
Tapi hakikat meuhat bak Allah
Tanyoe meutuah han trôh taduga
Virus corona nyang ka meuwabah
Saboh musibah dari nyang kuasa
Mungkén bak akhé lahé deuh leumah
Saboh hikeumah dari nyang kuasa
Mungkén geutanyoe jinoe hai ayah
Ka le that salah di dalam dônya
Ta eu kawôm droe di eungkhoe jajah
Saboh bismillah han tameudô′a
Ta eu Masjid nacit meunasah
Han tém jama′ah bak kaffee subra
Maksiet dum dikeue hanpeue tapeugah
Han tatém teugah peujiôh mungka
Le that tapubuet jeuheut dum salah
Pemimpin serakah dermawan hana
Rakyat ngon kawôm ladôm tertindas
Agama
Allah tan soe peuraya
Saboh agama ta meurô darah
Tameuparikah kadang saboh ma
Hasut peusuna hina ngon hujah
Di ateueh peuntah caci Ulama
Mandum nyang katrôh meusa′ôh susah
Rata daerah saban tarasa
Nyoe keuh cobaan rakan meutuawah
Ngon haté tabah ikhlas ngon rela
Tanyoe meulakèe teuntèe jeut sa′ah
Nibak potallah nyang Maha Kuasa
Zikir Seulaweuet jeut jeut meunasah
Beut kalam Allah beule meudô′a
Semoga acèh salèh bi Allah
Ji′ôh musibah beugadoh bala
Meunan keuh sabé bèk pré di babah
Ingat keu Allah tanyoe syédara.
0 facebook:
Post a Comment