ilustrasi vitamin A

Karya Marzuki Sabon


Yoh masa ubeut aneuk tajaga

Brie vitamin A keupada bayi

Meunyoe bit aneuk kasupot mata

TV wareuna hana areuti


Asai vitamin A ulon calitra

Supaya gata jeulah tatukri

Phon-phon bak eungkot jeulah kanyata

Meubago rupa deungo lon rawi


Eungkot lam laot darat seureuta

Eungkot lam paya, eungkot lam krueng ie

Banbandum eungkot le vitamin A

Tabrie le gata keupada Nyakti


Oh lheuh nyan dudo wahe e Cutda

Deungo lon rika supaya meuri

Bak mandum gule hijo wareuna

Miseu umpama lage on sawi


Dalam on rumpuen, reutek pih nyata

Boh mulieng teuma deungon on ubi

Pokok jih gule hijo wareuna

Pileh ri suka watee bloe campli


Dalam boh kayee meubago rupa

Kuneung wareuna, mirah pih asi

Di dalam pisang bak rumoh gata

Nyang sabe taba keu Teungku Rusli


Dalam boh mamplam, tomat seureuta

Dalam seumangka, seurta boh giri

Dalam boh panah, langsat, manggeh na

Pileh le gata keudro seundiri


Sinan keuh sumber di vitamin A

Tabrie le gata keu nyak Razali

Ohnoe keuh dilee hai vitamin A

Jinoe lon cuba laen lon rawi


Editor : Hamdani Mulya

SHARE :

0 facebook:

Post a Comment

 
Top