LAMPU LOM KALEN!

Oleh: T.A. Sakti

Ilustasi mati lampu

Assalmu’alaikom warahmatuhu

Rata penjuru saleuem lon kirem

Nibak malam nyoe kalen lom lampu

Ramadhan dulu aman  ‘alaihem

Ban sigom Aceh bunoe len lampu

Humas nyang bri su di dalam “jareng”

Aceh seupot klam malam nyoe Teungku

Jareueng beugitu pakon bandum len

Aleh na kontak rusak bak  sumbu

Sideh rot  timu  di Medan   meusen

Meunyo tapike hate teuh  tunu

Lawet nyoe  lampu mate tan  kayem

Meujan-jan malam teungoh pajoh bu

Meujan hanahu payah tot lilen

Citka lagee nyoe nanggroe  ka maju

Hase meutabu lampu  mantong  len

Na sidroe rakan  baklon geubri su

Hate that tunu lampu geuh kalen

Sabab karangan ka puntong iku

Meunyo tan lampu tuleh tan mungken

Ide karangan ka jipo brabru

Ladom u cong U ladom cong Maken

Dak geupeusaho han diwoe laju

Payah pajoh bu peuet uroe laen

Dilon pih nacit hate jeuet tunu

Meusabab lampu meunyo  beureusen

Kadang cit bak phon kheun “Amma b’akdu”

Ph’ot mate lampu hate that gigeng

Ide keunarang jipo u cong U

Jan-jan ji meusu watee lon yue tren

Hek  tapeusaho satu-persatu

Wab mate lampu jiwoe “gampong jen”

Jan watee malam teungoh pajoh bu

Kadang  dilampu ka mate meusen

Tan masaalah teungoh ta’ab bu

Babah hah laju bu cit meutunggeng

Teungoh cok-meucok nyang jadeh tunu

Niet tatamah bu roeh meugeue kareng

Cok eungkot payeh teu-eh teudu-du

Meuse sigeutu glah ie meutunggeng

Kadang meusigo sapat pajoh bu

Jeuet ka’a ka’u tunu sirakhem

Aneuk deungon Yah rampah-rampah bu

Kr’ang krieng dimeusu camca peh pireng

Teungoh geusuleueng Manyak geubri bu

Meunyo len lampu  karu  that baten

Si  Manyak ka ue ie tan disitu

Geuplueng u dapu seupot ‘aloihem!!!

Bit  le  seungsara meunyo  len lampu

Teungoh pajoh bu meunyo “tapeutren”

Ladom geusaba han pajoh laju

Peutoe  u  dapu geujak tot lilen

Jameun peureunoe aneukle Abu

Bek ka pajoh bu dalam seupot klem

Euntreuk kah hantroe rijang abeh bu

Sabab jibantu dijak ‘ab le jen!!

Nyang ladom meuh’ob meukr’ob kr’ob laju

Lilen di dapu tan meudhoi kareng

Meutamah palak meusipak bangku

Ang  ing  teubiet su; pukeeku hai  jen!!!

Roeh geusyeumarot geudhot po lampu

Meupeb-peb laju sampe trok lilen

“Meunyo  bak bayeue sisen milekmu

Silap sigeutu listrek ka gunteng!!”

Abeh han  abeh cae  bhaih  lampu

Meujampu jampu tunu ngon teukhem

Meunyo lampu trang garang dum ‘a’u

Di rumoh seru  urusan maseng 

Asai  seupot klam ka padam lampu

Aneuk deungon Ku akrab meukhem-khem

Peugah calitra  haba endatu

Poma geujampu peugah hiem leubeng!!

Sang teuka ubat jan mate lampu

Akrab bersatu duek lam hu lilen

Aneuk meuratoeh kheun cae lagu

Bloi  kahu lampu  dok  maseng-maseng!!

Wassalammu’alaikom ulon toep buhu

Keu pasai lampu kaseb lon salen

Keu rakan sahbat  hormat lon tuju

Kisah hai lampu ka panyang bandeng!!!

Bale Tambeh, 18 Mei 2022, pukul 22.30 wib.

SHARE :