Ie Raya Aceh

Gambar : Ilustrasi

Le H. Hilmi Hasballah

Allahu Rabbi seudeh bukonle

Aceh ka reule ie raya teuka

Buleun November bak tanggai akhe

Sayang boh hate  musibah nyata

Ladom gadoh yah lam lueng meugule

Nyawong hana le gadeh ngon harta

Cobaan Rabbi han soe ek pike

Cut Apa Toke nyawong tan le na

Di kaom poma pih seudeh kon le

Aneuk boh hate ka ie raya ba

Linto meuninggai nyawong hana le

Hate meusuwe musibah raya

Ie Raya Aceh seudeh bukonle

Dum ureueng mate duson ngon kuta

Teukedirollah gampong ka reule

Ureueng meugule lam rimba raya

Di dalam uteun ureueng mita awe

Ie raya lam gle hana soe sangka

Jalan Bireuen-Takengon lagak hana le

Musibah Allah bre tanyo geucuba

Aceh Tamiang seudeh bukonle

Ureung chik cre bre deungon ananda

Aceh Timu le nyawong tan le

Musibah sampe u Pidie Jaya

Titi putoh jalan han jeut le

Miseu tamse Kuta Blang raya

Jalan u Gayo hanco bukonle

Kayee dari gle leupah le jiba

Ureueng meungungsi rumoh hana le

Harta dum reule ka ie raya ba

Allahu Rabbi Nyang Maha Ade

Kamoe beu neubre bahgia teuma

Banda Aceh, 3 Desember 2025

SHARE :