Oleh TA Sakti
 |
Nyang geukheun Cikgu di Malaysia
Keu nasib udep hanjeuet ceumburu
Sabab di Cikgu leubeh sijahtra
Lethat problema lam suai guru
Jinoe e Teungku lon pileh dua
Phon hai sijahtra keudua mutu
Meupalet iku atra nyan dua
Meungtan sijahtra payah get mutu
Sabab lam tunu guru mengaja
Untong na gaya haba u cong U
Adak han guru reubah lam tika
Kredit keu Honda kredit keu dapu
Allah Tuhanku botak keupala
Lheueh geucok gaji tanle sigeutu
Habeh geubayeue hutang nyangka ka
‘Ohtan pat tarek burekle laku
Jeuet agen buku guru sikula
Peng nibak murid geukutip laju
Alasan Teungku masok logika
Teuma nyang ladom di guru-guru
Kadang geume bu ubak sikula
Geutijik kueh meulapeh ngen bu
Geupeuduek laju bak kios tuha
Kahek pikeran pawang kanot bu
Urusan guru jeuet lumboi dua
Meunye lagee nyan pane na mutu
Hanpeue tapacu meutan sijahtra
Guru DKI bit leupah gatu
Gaji geusibu ngen dana kesra
Dalam media meunan geubri su
Tiep buleuen Teungku peng dua juta
Laen nibak nyan dalam hai mutu
Bakat ngon laku patot takira
Nibak tes tamong sikula guru
Bakat keu cekgu sareng beusigra
Miseue bak FKIP- Tarbiyah tentu
Sareng Iniem u bek pura-pura
Meunye tan angleh na bakat guru
Disinan laju neuyue woe sigra
Sareng beurapat cok bakat guru
Bek rusak laju mutu sikula
Ureueng tan galak tagrak keu guru
Meuilah laku lagee meucuca
Trang peulajaran hantom na maju
Yue salen buku bak murid dumna
‘Oh habeh watee teubiet poguru
Pajan got mutu lagee nyan cara
Pomerintah Aceh geutanyoe rayu
Martabat guru patot geubina
Peulom ngon dana jinoe meutabu
Sijahtra guru, mutu pih beuna!!!
T.A. Sakti
Peminat sastra Aceh
0 facebook:
Post a Comment