Loading...

Oleh: T.A. Sakti


Assalamu’alaikom tanglong tangke got
Saleuem meusijot  keu Abu Ummi
Aceh beumakmu  jinoe tacah rot
Hai brok deungon got ulon ci rawi

Peurangoe nyan brok taboih lam urot
Pileh nyang got got keu akhlak budi
Barang gapeue buet pike brok ngon got
Bek jen peuwot wot lam ku’eh deuengki

Su meugr’oh meudhot ban leumo bak rot
Bingkeng seumilot iblieh nyang taki
Bandum atra nyan peurangoe tan got
Jeuet teumakot gob intat reseuki

Pariwisata Aceh peutimang beugot
Turis beusijot  dijak kalon kri
Meutatem satoh beujroh ta peugot
Aceh ek seutot wisata Bali

Aceh beumaju e panyot culot
Akai akai sot tatiek lam tuwi
Lalee meurawoh dawok meuwot wot
Geuleupak gob top bek preeh hai akhi

Peurangoe burek beureugheek kulot
Gadoh meuwot wot lam warong kupi
Bandum sifeuet nyan hanmee ta seutot
Perbuatan kulot bek le ta asi

Rumpuen Pase remmeune Nagan
Lagee meulisan mameh suara
Ureueng lam hate le gaseh sayang
Rijang na rakan ho ho geuteuka

Geuhala ugle meureumpok Makwang
Geutajo u blang meuturi Kuya
Geujak  u laot sambot le Pawang
Tamong lam Peukan sajan syeedaga

Mameh deungon su peurangoe sopan
Raseuki Tuhan cit jilet gata
Asai phui tuleueng bek ban ateueng blang
Mantong meukubang  troh watee dhuha

Tinggai di pasi jumot meusampan
Pukat geureuntang neuheuen usaha
Tinggai di gampong rajin meugoe blang
Pula tanaman nyang got hareuga

Nyang toe deungon gle keubon peutimang
Nilam ngon lawang beugot peulara
Maseng bak buet droe peubuet beureumbang
Karonya Tuhan raseuki pih na

Nibak peumimpin geutanyoe peusan
Barang pertanian yum jih bek goga
Yuem barang gampong yuem barang dagang
Beuna seuimbang pekriban cara

Meumada ohnoe himbauan peusan
Aceh tasayang beumaju sigra
Meu’ah pat salah bak suson kalam
Wa’alaikom salam bandum lon sapa!.
SHARE :

0 facebook:

Post a Comment

 
Top